खेलकुद

पर्वमा पनि महिला क्रिकेटर

ढिलै भएपनि पूर्वाञ्चलमा महिला क्रिकेट टिमको तयारी शुरु भएको छ। नेपाल फ्यान क्लबले खेलकुद सामग्री उपलब्ध गराएपछि मोरङको विराटनगर र हरैचामा महिलालाई क्रिकेट सिकाउन थालिएको हो। 

क्लबका केन्द्रीय सदस्य कैलाश खाकी श्रेष्ठका अनुसार क्लबले क्रिकेटका लागि आवश्यक व्याट, बललगायतका सामग्री दिएपछि महिला खेलाडीहरू अभ्यासका निम्ति मैदानमा ओर्लिएका छन्। फ्यान क्लबले ल्याएको प्रस्तावलाई जिल्ला खेलकुद विकास समितिका क्रिकेट प्रशिक्षक प्रदीप पाण्डेले स्वीकार गरेपछि डेढ महिनाअघि तालिम शुरु गरिएको हो।

पूर्वमा महिला टिम तयार भएपछि आन्तरिक प्रतियोगिता गरिने र त्यसपछि क्षेत्रीय तथा राष्ट्रिय स्तरका खेलहरूमा सहभागी बनाउँदै लगिने आयोजकले जनाएका छन्। कक्षा ६ देखि डिग्री पढ्नेसम्मका विद्यार्थी क्रिकेट सिक्न आउँछन्। तर, विद्यार्थीहरूको परीक्षा र पढाइले गर्दा समयमै टिम तयार हुन नसकेको प्रशिक्षक पाण्डेलेे बताए। टिम छिटै तयार हुने आयोजकको आशा छ।

क्रिकेट सिक्न आएकी कोभाष कलेजमा कक्षा १२ मा अध्ययनरत दिव्या सिंह खतिवडा भन्छिन्, “सानैदेखिको रहर बल्ल पूरा भएको छ, दाइ कुन्दन सिंह राष्ट्रिय खेलाडी भएकोले पनि क्रिकेट खेल्ने धोको पूरा भएको छ।”

महेन्द्र मोरङ आदर्श बहुमुखी क्याम्पसमा बीबीएस सकेर बसेकी रोजी राई पनि क्रिकेट सिक्ने मौका पाएकोमा गर्व गर्छिन्। भन्छिन्,“महिलाहरूले नजानिँदो तरिकाले पुरुषहरूको मात्रै वर्चस्व कायम गरेको क्षेत्रमा प्रवेश गर्न पाउँदा खुसी लागेको छ।' उनीसँगै २४ जनाभन्दा बढी विद्यार्थी तालिममा सहभागी छन्। हरैचामा पनि ठूलै सङ्ख्यामा महिलाहरूले क्रिकेट सिकिरहेका छन्। पश्चिमको बैतडी, नेपालगन्ज, धनगढी लगायत राजधानीमा पनि महिला क्रिकेट टिम तयार भइसकेको झ्ण्डै एक वर्षपछि पूर्व तातेको छ।

  • मनोज श्रेष्ठ, विराटनगर